ម៉ាកកាហ្វេថៃ១ទៀត នឹងត្រូវបើកសាខាដំបូងរបស់ខ្លួននៅកម្ពុជា

2018-02-26 02:22:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ម៉ាកកាហ្វេ អ៊ីនថានីន (Inthanin) របស់ថៃ នឹងត្រូវបើកសាខាទីមួយ នៅរាជធានីភ្នំពេញ នាខែមីនា ឆ្នាំ២០១៨ខាងមុខនេះ។ នេះជាការបញ្ជាក់របស់ថ្នាក់ដឹកនាំក្រុមហ៊ុន RCG Retail (Cambodia) Co., Ltd ប្រចាំនៅកម្ពុជា ទៅកាន់ទីភ្នាក់ងារសារព័ត៌មាន The Nation ក្រោយពិធីចុះអនុស្សរណៈនៃការយោគយល់គ្នា ជាមួយក្រុមហ៊ុន Bangchak Retail Co., Ltd ដែលមានទីតាំងនៅទីក្រុងបាងកក កាលពីសប្ដាហ៍មុន។

លោកស្រី Jiranun Wongmongkol ប្រធានក្រុមហ៊ុន RCG Retail (Cambodia) Co., Ltd បានឲ្យដឹងថា ក្រុមហ៊ុនរបស់លោកស្រីគ្រោងនាំយកម៉ាកកាហ្វេ អ៊ីនថានីន មកកម្ពុជា និងគ្រោងបើកលើសពី ១០០សាខានៅទូទាំងប្រទេស ចាប់ពីខែក្រោយ រហូតដល់ឆ្នាំ២០២២។ លោកស្រីបន្តថា បន្ទាប់ពីបើកសាខាដំបូងនៅភ្នំពេញ នាខែមីនា និងមានការបង្កើតសាខាទី២ នៅខេត្តសៀមរាប ក្នុងខែមេសាខាងមុខនេះ។

ប្រធានក្រុមហ៊ុនដដែលបានបន្ថែមទៀតថា តម្លៃស្នើសុំអាជ្ញាប័ណ្ណ ដើម្បីបើកមួយសាខា ត្រូវចំណាយប្រហែល ២០ម៉ឺនដុល្លារអាមេរិក ហើយមួយសាខា ត្រូវជួលបុគ្គលិកប្រមាណជា ២០នាក់។

ចំណែក នាយកគ្រប់គ្រងក្រុមហ៊ុន Bangchak Retail Co., Ltd លោក Viboon Wongsakul បានប្រាប់ថា ការបើកហាងកាហ្វេ អ៊ីនថានីន នៅកម្ពុជា ជាផ្នែកមួយនៃផែនការពង្រីកជំនួញនៅប្រទេសកម្ពុជា ឡាវ មីយ៉ាន់ម៉ា និង វៀតណាម។ លោកអះអាងថា នៅឆ្នាំដំបូងនៃដំណើរការនៅកម្ពុជា ក្រុមហ៊ុនរបស់លោកគ្រោងលក់ឲ្យបាន ៣០០កែវ ក្នុង១ថ្ងៃ។

ចំពោះការផ្គត់ផ្គង់គ្រាប់កាហ្វេ នឹងនាំចូលពីថៃ ហើយប្រភេទនំ និងចំណីអាហារ ដែលត្រូវលក់នៅហាងកាហ្វេ អ៊ីនថានីន នឹងត្រូវចែកចាយដោយអ្នកផលិតក្នុងស្រុក។ មកទល់ពេលនេះ អ្នកផលិត ២០រូប បានចុះកុងត្រាជាមួយភាគីថៃរួចរាល់ហើយ។ ការវិនិយោគនេះ នឹងបង្កើតការងារជាង ២ពាន់កន្លែង ដោយគិតចាប់ពីឆ្នាំ២០១៨ ដល់ ២០២២។ នេះជាការបញ្ជាក់របស់លោកស្រី Jiranun ។

សូមបញ្ជាក់ថា ហាងកាហ្វេ អ៊ីនថានីន មិនមែនជាហាងកាហ្វេទីមួយរបស់ថៃ ដែលបានពង្រីកសាខារបស់ខ្លួននៅកម្ពុជានោះទេ ដោយបច្ចុប្បន្ន ក៏មានហាងកាហ្វេថៃមួយចំនួនទៀត កំពុងដំណើរការ ដូចជា ហាងកាហ្វេអាម៉ាហ្សូន និងខូហ្វីធូដេ ជាដើម៕

អត្ថបទ៖ លាភ.